പ്രൊഫ. എം. കെ. സാനു
ഞങ്ങള് അടുത്ത സുഹൃത്തുക്കളായിരുന്നു. കളങ്കമില്ലാത്ത ഒരു മനുഷ്യനായിരുന്നു സ. കെ. എ. രാജന്. അദ്ദേഹം തൃശൂര് നിന്ന് എം. പി യായി മത്സരിച്ചപ്പോള് ഞാനദ്ദേഹത്തിനു വേണ്ടി പ്രസംഗിച്ചിട്ടുണ്ട്. രാജന്റെ സ്വഭാവശുദ്ധി ഞാന് വളരെയധികം മാനിച്ചിരുന്നു.
ശ്രീ. രാജനെക്കുറിച്ച് മുമ്പ് കുങ്കുമം വാരികയില് മൂന്നു ലക്കങ്ങളിലായി ഞാന് ഒരു ലേഖനം എഴുതിയിരുന്നു. സംഭവങ്ങളൊന്നും ഇപ്പോള് എനിക്ക് ഓര്മ്മയില്ല. ഞങ്ങളൊരുമിച്ചുള്ള അനുഭവങ്ങളൊന്നും ഓര്ത്തെടുക്കാന് കഴിയുന്നില്ല. അദ്ദേഹം പ്രതിയായിരുന്ന ഇടപ്പള്ളി വെടിവയ്പ്പു കേസിനെ ക്കുറിച്ചൊക്കെ അതില് പ്രതിപാദിച്ചിട്ടുണ്ട്.
രണ്ടു കുട്ടികളാണ് രാജന്. നല്ല മാന്യമായ സ്വഭാവമുള്ള രണ്ട് ആണ്മക്കള്. എന്റെ വീടിനടുത്തു തന്നെയാണ് രാജന്റെ വീട്. നിരന്തരമായി ബന്ധപ്പെട്ടിരുന്നു. ദൃഢസൗഹാര്ദ്ദം സൂക്ഷിച്ചിരുന്നു. ഒരിക്കല് ഇവിടെ അടുത്തുള്ള ഒരു വീട് പരിഷ്കരിച്ച് ബാറാക്കാന് ശ്രമം നടന്നപ്പോള് ഞങ്ങള് രണ്ടുപേരും ചേര്ന്ന് അതിനെതിരെ നാട്ടുകാരെ സംഘടിപ്പിച്ചു. പ്രതിഷേധ പ്രകടനങ്ങള് നടത്തി. അതിനെ ചെറുത്തു തോല്പിക്കാന് ഒരു പാട് ശ്രമങ്ങള് നടത്തി. ഞങ്ങളിരുവരും കൂടി എക്സൈസുമ്രന്തിയെ പോയി കണ്ടു. ഒടുവില് ഞങ്ങള് വിജയിച്ചു. ബാറുണ്ടാക്കാനുള്ള ശ്രമം പൊളിഞ്ഞു.
എസ്. സി. എസ്. മേനോനുമായി രാജന് അടുത്ത ചങ്ങാത്തമായിരുന്നു. മേനോന് ദിവസവും വരും രാജന്റെ വീട്ടിലേയ്ക്ക്. എന്റെ വീടിനുമുന്നിലൂടെ വേണമല്ലോ രാജന്റെ വീട്ടിലേയ്ക്കു പോകാന്. അതുകൊണ്ട് അവര് ദിവസവും കണ്ടുമുട്ടാറുണ്ടെന്ന് എനിക്കറിയാം. ഇപ്പോള് ഹിന്ദുവില് നിന്ന് പിരിഞ്ഞ് ദേശാഭിമാനി തിരുവനന്തപുരത്ത് ജോലി ചെയ്യുന്ന ഗോവിന്ദന്കുട്ടിയാണ് മറ്റൊരു ചങ്ങാതി. അതുപോലെ വൈക്കം മുഹമ്മദ് ബഷീറുമായും നല്ല അടുപ്പമുണ്ടായിരുന്നുവെന്നറിയാം. സാഹിത്യകാരന്മാരുമായി നല്ല ബന്ധം സൂക്ഷിച്ചിരുന്നു. ഏറ്റവും വലിയ പ്രത്യേകത, സ്വതേ സൗമ്യ പ്രകൃതിയായിരുന്ന രാജന് കക്ഷി രാഷ്ട്രീയമുണ്ടായിരുന്നില്ല രാഷ്ട്രീയ സങ്കുചിതത്വത്തിന് അതീതനായിരുന്നു രാജന്.